Акыркы макалалар

Исаков менен Кулматов камакка алынды

Исаков менен Кулматов камакка алынды

Бүгүн мурдагы премьер-министр Сапар Исаков жана экс-мэр Кубанычбек Кулматов УКМКнын тергөө абагына камакка алынды.

Экс-президент Алмазбек Атамбаевдин ишенимдүү адамдары - мурдагы премьер-министр Сапар Исаков жана Бишкек шаарынын экс-мэри, Мамлекеттик бажы кызматынын мурдагы башчысы Кубанычбек Кулматов УКМКнын тергөө абагына камакка алынды. Экөөнүн тең бөгөт чарасын Бишкектин Биринчи май райондук сотунун судьясы Абдразак Боромбаев аныктады.

САПАР ИСАКОВДУН КАМАЛЫШЫ

УКМКнын коомчулук менен байланыш бөлүмү Сапар Исаковдун бөгөт чарасы тергөө аяктаганга чейин камакка алууга өзгөртүлгөнүн кабарлады. Мекеменин маалыматында 29-майда Бишкек ЖЭБин модернизациялоодогу коррупция фактысы боюнча тергелип жаткан кылмыш ишинин алкагында Исаковго Кылмыш-жаза кодексинин 303-беренесинин 1-бөлүгү боюнча айып тагылып, эч жакка кетпөө жөнүндө тилкат алуу аркылуу бөгөт чарасы тандалып алынган.

Мурдагы премьер-министр Сапар Исаков бүгүн сурак бериш үчүн Улуттук коопсуздук боюнча мамлекеттик комитетке (УКМК) барган. Ал мекемеге кирип баратып ошол жерде турган журналисттерге “мыйзамды сыйлаган киши катары ар бир суракка убагында келип жатканын” айткан.

Бишкек Жылуулук электр борборун (ЖЭБ) модернизациялоодогу 386 млн. доллар кытай насыясын максатсыз пайдаланганы үчүн 29-майда Исаковго Кылмыш-жаза кодексинин 303-беренесинин 1-бөлүгү ("Коррупция") менен кылмыш иши козголгон. Ошол эле күнү ага айыбы угузулуп, "эч жакка чыкпоо" жөнүндө тилкатынын негизинде бөгөт чарасы бекитилген. Сапар Исаков өзүнө козголгон кылмыш ишин “чектен чыгуу” катары баалаган.

17-майда Жогорку Кеңеш ЖЭБ чуусун иликтеген депутаттык комиссиянын бүтүмүнө ылайык, 386 млн. доллар кытай насыясынын максатсыз сарпталышына байланыштуу айрым аткаминерлерге укуктук баа берүү боюнча токтом кабыл алган. Ал токтомдо ошол кездеги президенттик аппараттын тышкы саясат бөлүмүн жетектеген Сапар Исаковго укуктук баа берүү боюнча өзүнчө пункт бар.

КУЛМАТОВДУН КАМАЛЫШЫ

Бүгүн Улуттук коопсуздук боюнча мамлекеттик комитетке (УКМК) кайрадан суракка чакырылган Бишкек шаарынын мурдагы мэри жана Мамлекеттик бажы кызматынын мурдагы башчысы Кубанычбек Кулматов атайын кызматтын имаратына саат 15.00дө кирип, 3 жарым сааттан кийин чыккан. Кулматов чыккандан кийин журналисттерге УКМКдан Биринчи май райондук сотуна баратканын айткан.

Кулматовго 18-майда Кылмыш-жаза кодексинин 303-беренесинин 1-бөлүгү ("Коррупция") боюнча айып тагылган, үйү тинтүүгө алынып, мүлкү камакка алынган. Ал буга чейин да УКМКга бир нече жолу суракка чакырылган.

Тергөө Кулматов 2014-жылы мэр болуп турган кезде Кытайдын ТВЕА компаниясы Бишкектин Жылуулук электр борборуна жана Калыс-Ордо конушундагы мектептин курулушуна берген акчаны мыйзамсыз коротууга тиешеси бар экенин маалымдаган.

Кулматов өзүнө тагылган айыпка макул эместигин маалымдаган.

Түп нускага шилтеме : www.azattyk.org

Бир гана сайтта катталгандар пикирлерин жаза алат. Эгер катталган болсоңуз, анда аккаунтуңузга кириңиз.
катталгандар гана колдонуучулар "ЖМКларга даттанууларды териштирүү комиссиясына" арыздана алат. Эгер сиздин аккаунтуңуз бар болсо, анда кириңиз.

Азырынча бир да пикир жок...